Kristinn er á leiðinni til Þýskalands

Kristinn Björgúlfsson fyrrverandi þjálfari karlaliðs ÍR hefur tekið fram handknattleiksskóna og er á leiðinni til Þýskalands þar sem hann tekur þátt í kveðjuleik fyrir markvörðinn Max Brustmann sem hefur ákveðið að leggja skóna á hilluna.

Brustmann var árum saman markvörður þýska liðsins DJK Rimpar Wölfe og var m.a. samherji Kristins hjá liði félagsins leiktíðina 2008/2009. Kveðjuleikurinn fer fram á heimavelli DJK Rimpar Wölfe á föstudaginn og verður mikið um dýrðir. Í honum taka þátt margir samherjar Brustmann í gegnum tíðina, þar á meðal Kristinn.

„Mér finnst mjög gaman að fá boð um að vera með í leiknum. Um leið er það heiður. Maður kemust vonandi ennþá í treyjuna,“ sagði Kristinn léttur í bragði við handbolta.is í dag eftir að DJK Rimpar Wölfe hafði opinberað að hann taki þátt í leiknum sem verður fyrst og fremst til gamans.