Guðni verður Þóri til halds og trausts

Guðni Ingvarsson hefur verið ráðinn aðstoðarþjálfari Selfoss í meistaraflokks karla í handknattleik. Guðni verður nýráðnum þjálfara liðsins, Þóri Ólafssyni innan handar.

Guðni hlaut sitt handboltalega uppeldi á Selfossi, þar sem hann lék svo sín fyrstu ár í meistaraflokki. Hann lék einnig nokkur ár í Vestmannaeyjum og tók einn vetur í Gróttu áður en hann sneri aftur heim á Selfoss. Guðni varð bikarmeistari með ÍBV og Íslandsmeistari bæði með ÍBV og Selfossi.

„Guðni var leiðtogi sem leikmaður og mun hafa sterka rödd inn í hópinn. Það er frábært að fá hann á ný inn í félagið,“ segir í tilkynningu frá handknattleiksdeild Selfoss í dag.