Batinn hjá Darra Aronssyni handknattleiksmanni hefur verið aðeins hægari en vonir stóðu til í fyrstu en hann ristarbrotnaði rétt fyrir miðjan júlí, nokkrum dögum áður en hann átti að mæta til æfinga hjá franska 1. deildarliðinu US Ivry. Darri hefur verið í göngugifsi í mánuð og sagði við handbolta.is í dag að reikna megi með að mánuður líði í viðbót áður en hann losnar úr því.
Vonir stóðu til að sex vikur í göngugifsi dygðu en því miður hefur sú ekki orðið raunin og líklega verða vikurnar orðnar átta áður en ristin hefur gróið nægilega vel svo hægt verð að sleppa göngugifsinu. Darri kemst þó hjá aðgerð sem telst lán í óláni.
Þegar göngugifsinu sleppir tekur við endurhæfing áður en vonir standa til þess að Darri getur byrjað að leika með Parísarliðinu. Darri samdi við US Ivry til þriggja ára í mars en það kom upp í efstu deild í vor að lokinni eins árs veru í næst efstu deild.
„Þetta er þreytt en félagið sýnir mér mikinn stuðning,“ sagði Darri sem verður áfram að bíta á jaxlinn og reyna á þolinmæðina í sumarhitanum í París.
Eins og Darri sagði í samtali við handbolta.is upp úr miðjum júlí þá brotnaði ristin fyrirvaralaust þegar hann var á gangi utan æfingar. Líklegasta ástæðan fyrir brotinu er of mikill dugnaður við æfingar í vor og sumar.
