Þrefaldir meistarar taka á móti KA í meistarakeppni HSÍ

Á laugardaginn verður leikið í meistarakeppni karla í handknattleik. Þá mætast Íslands-, bikar-, og deildarmeistarar Vals og KA í Origohöll Valsara við Hlíðarenda. Flautað verður til leiks klukkan 16. KA vann sér þátttökurétt í meistarakeppninni með því að leika til úrslita við Val í bikarkeppninni í mars sl.

Íslandsmeistarar Fram og bikarmeistarar Vals mætast í meistarakeppninni í kvennaflokki í nýju íþróttahúsi Fram í Úlfarsárdal laugardaginn 10. september. Það verður fyrsti stórleikurinn í glæsilegu nýju íþróttahúsi sem opnað var í sumar og mun hýsa innanhússíþróttir Fram eftir að félagið flutti bækistöðvar sínar úr Safamýri í byrjun sumars.

Leikirnir í meistarakeppni HSÍ marka upphaf Íslandsmótsins í Olísdeildunum. Keppni hefst í Olísdeild karla fimmtudaginn 8. september með fjórum leikjum og þeim fimmta daginn eftir. Viku síðar verður flautað til leiks í Olísdeild kvenna. Fyrstu leikirnir í Grill66-deildum karla og kvenna verða föstudaginn 23. september.