- Auglýsing -
- Eiður Rafn Valsson skoraði fyrsta mark Olísdeildar karla í gær þegar hann kom Fram yfir, 1:0, á móti Selfossi í upphafsleik deildarinnar. Um leið var þetta fyrsta markið sem skorað var í Olísdeildinni í nýju íþróttahúsi Fram í Úlfarsársdal.
- Markið verður væntanlega sérlega eftirminnilegt fyrir hinn unga Eið Rafn þar sem hann var að taka þátt í sínum fyrsta leik með Fram í Olísdeildinni. Eiður Rafn er bróðursonur Einars Rafns Eiðssonar leikmanns KA sem einnig lék eitt sinn með Fram.
- Viktor Sigurðsson, leikmaður ÍR, var fyrsti leikmaðurinn til þess að fá rautt spjald í Olísdeildinni á keppnistímabilinu. Ómar Örn Jónsson varð um leið fyrsti dómarinn á tímabilinu til þess að lyfta spjaldinu rauða úr vasa sínum til þess að beina því að leikmanni.
- Einn leikmaður skoraði fleiri en einn tug marka í fyrstu leikjum Olísdeildarinnar í gær. Róbert Aron Hostert skoraði 12 af 25 mörkum Vals í naumum sigri á Aftureldingu í Origohöllinni, 25:24. Róbert Aron skoraði ekkert mark úr vítakasti.
- Aldís Ásta Heimisdóttir skoraði þrjú mörk og Ásdís Guðmundsdóttir eitt fyrir Skara HF þegar liðið tapaði með sex marka mun fyrir meisturum IK Sävehof í fyrstu umferð sænsku úrvalsdeildarinnar í handknattleik kvenna í gærkvöld. Skara HF, sem lék á heimavelli, hélt í við meistarana í 45 mínútur. Jafnt var í hálfleik, 13:13. Aldís Ásta var valin maður leiksins.
- Arnar Birkir Hálfdánsson og Elvar Ásgeirsson skoruðu þrjú mörk hvor þegar lið þeirra, Ribe-Esbjerg, tapaði á útivelli fyrir Kolding, 29:26, í annarri umferð dönsku úrvalsdeildarinnar í gærkvöld. Ágúst Elí Björgvinsson stóð nærri allan leikinn í marki Ribe-Esbjerg í heimsókninni á gamla heimavöllinn. Hann varði 8 skot, 22%, þar af eitt vítakast.
- Auglýsing -
