Teitur Örn geigaði ekki á skoti

Flensburg og Füchse Berlin eru efst og taplaus eftir þrjár umferðir í þýsku 1. deildinni í handknattleik en umferðin hófst í gær og lýkur í dag.

Teitur Örn Einarsson skoraði fimm mörk í jafn mörgum skotum þegar lið hans Flensburg vann öruggan sigur á Hannover-Burgdorf, 35:25, á heimavelli síðarnefnda liðsins. Heiðmar Felixson er aðstoðarþjálfari Hannover-Burgdorf. Liðið var taplaust fyrir heimsókn Flensburgarliðsins í gær.

Franz Semper og Emil Jakobsen skoruðu sjö mörk hvort fyrir Flensburg og voru markahæstir. Renars Uscins var atkvæðamestur leikmanna Hannover-Burgdorf við að skorað. Hann gerði níu mörk.

Arnar Freyr Arnarsson skoraði tvö mörk fyrir MT Melsungen þegar liðið gerði jafntefli við Lemgo, 28:28, á heimavelli Lemgo. Bobby Schagen jafnaði metin þegar rúmar tvær mínútur voru til leiksloka.

Samuel Zehnder skoraði átta mörk fyrir Lemgo og Ivar Martinovic skoraði einnig átta sinnum fyrir Melsungen. Liðið hefur þrjú stig.

Füchse Berlin vann Stuttgart, 31:21. Hvorki gengur né rekur hjá Stuttgartliðinu. Það er án stiga eftir þrjá leiki.