Aron Kristjánsson, þjálfari karlaliðs Hauka, vonast til þess að stutt sé í að hægri hornamennirnir Brynjólfur Snær Brynjólfsson og Halldór Ingi Jónasson, geti farið að æfa með liðinu af fullum krafti. Báðir hafa þeir glímt við meiðsli um nokkurt skeið. Lengra er hinsvegar í að Darri Aronsson mæti á völlinn á nýjan leik en þessi ungi og efnilegi handknattleiksmaður hefur verið einstaklega óheppinn með meiðsli síðasta árið.
„Brynjólfur er búinn að vera meiddur síðan í sumarfríinu en getur vonandi byrjað að æfa á fullu núna. Sömu sögu er að segja af Halldóri Inga. Hann fór í sprautu út af meiðslum frá því í fyrra og er að byrja aftur líka,“ sagði Aron þegar handbolti.is leitað fregna úr herbúðum Hauka.
Darri er ekki enn farinn að æfa með liðinu í sal en það fer vonandi að styttast í það. Hann sleit krossbönd í byrjun síðasta leiktímabils og reif einnig liðþófa. Síðan þurfti hann að fara í axlaraðgerð í lok júní, hreinsun, sem á að jafna sig á þremur mánuðum. Ef allt gengur vel. Það tafði líka endurkomuna varðandi hnéð en þetta er vonandi á réttri leið hjá honum núna,” sagði Aron ennfremur en hann tók við þjálfun karlaliðs Hauka í vor, sjö árum eftir að hann sagði skilið við uppeldisfélagið og tók alfarið við íslenska landsliðinu sem hann stýrði til ársins 2016. Eftir það þjálfaði Aron KIF Kolding Köbenhavn og Aalborg Håndbold auk landsliðs Barein með afbragðsgóðum árangri.
Haukar sækja nýliða Gróttu heim í Hertz-höllina í fyrstu umferð Olís-deildarinnar fimmtudaginn 10. september.
