- Auglýsing -
- Cornelia Hermansson, markvörður, fékk loksins leikheimild með Selfossi í gær og verður þar með gjaldgeng með Selfossliðinu þegar það tekur á móti Val í Olísdeild kvenna í Sethöllinni á Selfossi í dag. Hermansson var ekki komin með leikheimild í 1. umferð þegar Selfoss sótti HK heim í Kórinn og vann fyrir viku. Tilkynnt var um komu Hermannsson til Selfoss í sumar frá sænska liðinu Kärra HF en af einhverjum ástæðum dróst að tryggja henni leikheimild fyrr en í gær.
- Guðrún Erla Bjarnadóttir fékk leikheimild í gær með Fjölni/Fylki, rétt áður en liðið mætti Víkingi í 1. umferð Grill66-deildar. Guðrún Erla ákvað í sumar að skipta yfir til Fjölnis/Fylkis ekki tókst að hnýta endahnútinn á skiptin fyrr enn á elleftu stundu.
- Hinn trausti markvörður Þórs á Akureyri, Arnar Þór Fylkisson, hefur framlengt samning sinn við félagið og mun þar með hiklaust standa á milli stanganna í marki liðsins á leiktíðinni sem hófst í Grill66-deildinni í gær.
- Arnar Þór hefur leikið með Þór síðan slitnaði upp úr samstarfi Akureyrarfélaganna um að halda úti Akureyri handboltafélagi. Arnar Þór var markvörður sameiginlegs liðs um nokkurt skeið og vakti ungur athygli fyrir vasklega frammistöðu.
- Einnig rituðu Sigurður Ringsted og Tristan Ylur Guðjónsson, ungir handknattleiksmenn undir samning við handknattleiksdeild Þórs í vikunni.
- Penninn var ekki bara á lofti hjá Þórsurum heldur voru forvígismenn kvennaliðs KA/Þórs einnig með kúlupenna uppi við í vikunni og notuðu tækifærið og skrifuðu undir samninga við Agnesi Völu Tryggvadóttur, Telmu Ósk Þórhallsdóttur, Lydíu Gunnþórsdóttur og Aþenu Sif Einvarðsdóttur. Allar komu þær við sögu hjá meistaraflokki á síðustu leiktíð og verða án nokkurs vafa í stærra hlutverki í vetur eftir að nokkrar breytingar hafa átt sér stað á leikmannahópi KA/Þórs. KA/Þór tekur á móti Haukum í síðasta leik annarar umferðar Olísdeildar kvenna í KA-heimilinu á morgun klukkan 16.
handbolti.is nýtur ekki opinbers rekstrarstuðnings.
- Auglýsing -
