„Það er frábært að fá Alexander aftur inn í hópinn og fá að njóta hans reynslu og liðsinnis,“ sagði Guðmundur Þórður Guðmundsson, landsliðsþjálfari í handknattleik karla á blaðamannafundi í gær um þá ákvörðun Alexanders Peterssonar að gefa kost á sér aftur í íslenska landsliðið í handknattleik karla fyrir leikina í undankeppni EM í byrjun janúar og heimsmeistaramótið í Egyptalandi síðar í þeim mánuði.
Alexander gaf kost á sér á nýjan leik fyrir EM í byrjun þessa árs eftir fjögurra ára fjarveru. Hann gat ekki verið með í leiknum við Lithaén í undankeppni EM í nóvember vegna meiðsla á öxl. „Alexander hefur jafnað sig af meiðslunum og vill vera með okkur sem er mjög gott.
Alexander var stórkostlegur á Evrópumótinu í byrjun þessa árs, í frábæru formi og er öðrum og yngri leikmönnum mikil fyrirmynd. Hann kom þá inn í hópinn á EM með gríðarlega góðan anda, kraft og leikgleði. Hann á ábyggilega eftir að hjálpa liðinu mjög mikið og þeim leikmönnum sem hann leikur með,“ sagði Guðmundur Þórður Guðmundsson, landsliðsþjálfari.
Alexander hefur tekið þátt í fjórum heimsmeistaramótum með íslenska landsliðinu 2005 í Túnis, 2007 í Þýskalandi, 2011 í Svíþjóð og 2015 í Katar. Samtals eru HM-leikir 30 og mörkin 144. Alexander var markahæsti leikmaður íslenska landsliðsins á HM 2011 með 53 mörk í níu leikjum og var í mótslok valinn í úrvalslið mótsins.
Alexander þriðji markahæsti leikmaður íslenska landsliðsins á HM frá upphafi. Aðeins Guðjón Valur Sigurðsson 294 mörk og Ólafur Stefánsson 227 mörk hafa skoraði fleiri. Hann er einn fimm Íslendinga sem hefur rofið 100 marka múrinn fyrir landslið á HM. Auk hans, Guðjóns og Ólafs eru það Patrekur Jóhannesson með 121 mark og Snorri Steinn Guðjónsson með 112.
