Lærisveinar Guðjóns Vals Sigurðsson í Gummersbach gefa ekkert eftir í toppbaráttu í 2. deildar í Þýskalandi. Í kvöld tóku þeir Íslendingaliðið Bietigheim í kennslustund og unnu það með 14 marka mun, 31:17, á heimavelli og treystu um leið stöðu sína í efsta sæti deildarinnar.
Gummersbach hefur 20 stig eftir 11 leiki og er tveimur stigum á undan Hamburg sem situr í öðru sæti og sex stigum ofar en TuS N-Lübbecke sem er í þriðja sæti.
Elliði Snær Viðarsson skoraði þrjú af mörkum Gummersbach-liðsins að þessu sinni. Hann var einnig aðsópsmikill í vörninni.
Aron Rafn Eðvarðsson náði sér ekki á strik í marki Bietigheim. Hann varði fimm skot á þeim 40 mínútum sem hann stóð í marki liðsins. Það er um 18% hlutfallsmarkvarsla. Hannes Jón Jónsson er þjálfari Bietigheim.
Staðan var 15:10 í hálfleik en leiðir liðanna skildu fyrst og fremst í síðari hálfleik.
Bietigheim situr í 15. sæti af 19 liðum deildarinnar.
