Grótta heldur sigurgöngu sinni áfram undir stjórn Gunnars Gunnarssonar í Grill66-deild kvenna í kvenna í handknattleik. Í kvöld hafði Grótta betur á heimavelli gegn FH, 31:23. Fyrir viðureignina hafði hvorugt liðanna tapað stigi. Grótta var marki yfir í hálfleik, 12:11. Það var ekki fyrr en nokkuð var komið fram í síðari hálfleik sem leiðir liðanna skildu.
FH-liðið fór betur af stað og náði um skeið þriggja marka forskoti, 10:7, áður en verulega lifnaði yfir Gróttuliðinu sem tókst að fara með eins marks forskot inn í hálfleikshléið, eins og áður segir.
Framan af síðari hálfleik héldust leikmenn liðanna í hendur allt þar til í stöðunni 18:18. Þá skellti Grótta í lás í vörninni og tók á rás í sókninni sem varð til þess að sigurinn varð afar öruggur þegar upp var staðið, 31:23.
Mörk Gróttu: Ída Margrét Stefánsdóttir 10, Katrín Anna Ámundsdóttir 6, Valgerður Helga Ísaksdóttir 5, Lilja Hrund Stefánsdóttir 4, Anna Katrín Stefánsdóttir 3, Margrét Björg Castillo 2, Þóra María Sigurjónsdóttir 1.
Varin skot: Tinna Húnbjörg 11, Signý Pála Pálsdóttir 1.
Mörk FH: Aníta Björk Valgeirsdóttir 6, Hildur Guðjónsdóttir 5, Ragnhildur Edda Þórðardóttir 5, Birna Íris Helgadóttir 2, Telma Medos 2, Arndís Sara Þórsdóttir 1, Ivana Meincke 1, Vera Víglundsdóttir 1.
Varin skot: Því miður er ekki getið um varin skot markvarða FH hjá HBstatz.
Fjögurra marka sigur á bleikum sokkum
Víkingur færðist upp að hlið FH með fjögur stig eftir þrjár umferðir í Grill66-deild kvenna í kvöld með baráttusigri á ungmennaliði HK, 38:34, í Safamýri. Var þetta annar heimasigur Víkingskvenna á nýjum heimavelli liðsins.
Í tilefni af degi bleiku slaufunnar í dag léku leikmenn Víkings í bleikum sokkum í leiknum í kvöld. Á Facebooksíðu félagsins eru leikmenn annarra liða hvattir til þess að taka þátt í átakinu með því m.a. að fylgja fordæmi Víkingsliðsins og skarta bleikum sokkum í næstu leikjum.
Staðan var jöfn í hálfleik í Safamýri í kvöld, 18:18. Þegar komið var fram yfir tíundu mínútu síðari hálfleiks þá tóku Víkingar af skarið og náðu forystu sem HK-liðinu tókst ekki að vinna upp. Fátt var um varnir í leiknum en þeim mun meira um mörk og skemmtilegan sóknarleik af hálfu beggja liða.
Mörk Víkings: Ída Bjarklind Magnúsdóttir 11, Arna Þyrí Ólafsdóttir 10, Mattý Rós Birgisdóttir 6, Auður Brynja Sölvadóttir 5, Guðrún Jenný Sigurðardóttir 4, Díana Ágústsdóttir 1, Hafdís Shizuka Iura 1.
Mörk HK U.: Anna Valdís Garðarsdóttir 10, Amelía Laufey Gunnarsdóttir 6, Ágústa Rún Jónasdóttir 5, Rakel Dórothea Ágústsdóttir 5, Jóhanna Lind Jónasdóttir 3, Katrín Hekla Magnúsdóttir 3, Auður Katrín Jónasdóttir 1, Margrét Guðmundsdóttir 1.
Því miður er engar upplýsingar að fá um varin skot markvarða liðanna í tölfræði HBstatz.
Staðan og næstu leikur í Grill66-deild kvenna.
