- Auglýsing -
Íslendingaliðin Holstebro og EH Aalborg halda áfram að vinna sína leiki og vera í toppbaráttu dönsku 1. deildarinnar í handknattleik kvenna. Berta Rut Harðardóttir lék með Holstebro sem er efst í deildinni með tíu stig eftir fimm leiki eftir sigur á HIK á heimavelli í dag, 37:29.
Berta Rut, sem gekk til liðs við Holstebro í sumar, skoraði ekki mark í dag. Er það fyrsti leikurinn þar sem hún nær ekki að skora.
Andrea Jacobsen landsliðskona skoraði fimm mörk þegar EH Aalborg vann Roskilde Håndbold, 32:23, í Hróarskeldu í dag. EH Aalborg réði lögum og lofum í leiknum frá upphafi til enda og hefur nú unnið fjóra leiki röð eftir að hafa tapað í fyrstu umferð. Andrea var næst markahæst í liði EH Aalborg að þessu sinni.
- Auglýsing -
