Ómar Ingi Magnússon skoraði fjögur mörk og Gísli Þorgeir Kristjánsson eitt þegar SC Magdeburg vann sádi arbíska liðið Khaleej, 35:29, í riðlakeppni heimsmeistaramóts félagsliða í handknattleik í Dammam í Sádi Arabíu í dag. Þar með komust meistarar síðasta árs áfram í undanúrslit mótsins sem fram fara á laugardaginn.
Leikmönnum Khaleej tókst lengi vel að standa nokkuð vel upp í hárinu á þýsku meisturunum. Aðeins var fjögurra marka munur á liðunum þegar fyrri hálfleikur var að baki, 17:14.
Undanúrslitaleikirnir
Magdeburg mætir egypsku meisturunum Al Ahly í undanúrslitum á laugardaginn. Í hinni viðureign undanúrslita eigast við liðin sem léku til úrslita í Meistaradeild Evrópu í vor, Barcelona og Łomża Industria Kielce.
Al Ahly lagði stein í götu Benfica
Markvörðurinn Abd Elrahman var hetja egypska liðsins Al Ahly þegar liðið vann Benfica, 29:28, í B-riðli í dag. Elrahman varði vítakast frá hinum gamalreynda sænska handknattleiksmanni, Jonas Källman, á síðustu sekúndum leiksins. Sigurinn færði egypska liðinu sigur í riðlinum og sæti í undanúrslitum heimsmeistaramótsins sem fram fer á laugardaginn.
Omar Khaled Hassan var markahæstur hjá Al Ahly með átta mörk og næst var Ahmed Mesilhy með sjö mörk. Petar Djordic skoraði níu mörk fyrir Benficaliðið.
Ole Rahmel leikmaður Benfica fékk beint rautt spjald fyrir stöðva hraðaupphlaup síðla leiks og samherji hans Alexis Borges varð að yfirgefa völlinn á 44. mínútu við þriðju brottvísun.
