- Andrea Jacobsen skoraði þrjú mörk þegar lið hennar, EH Alaborg vann stórsigur á DHG Odense, 34:20, á heimavelli í gærkvöld í upphafsleik sjöttu umferðar. EH Alaborg er komið upp að hlið Bjerringbro og Holstebro. Síðarnefndu liðin tvö eiga leik til góða.
- Kristján Örn Kristjánsson var markahæstur hjá PAUC þegar liðið vann Toulouse með eins marks mun, 26:25, í frönsku 1. deildinni í handknattleik. Donni skoraði sex mörk. PAUC er í fimmta sæti deildarinnar með átta stig eftir sex leiki, aðeins tveimur stigum á eftir Nantes og PSG sem eru í tveimur efstu sætum. Nantes á leik til góða.
- Grétar Ari Guðjónsson varði fimm skot af 21 sem hann fékk á sig í marki Sélestat þegar liðið tapaði fyrir Saint Raphaël, 39:30, á útivelli. Nýliðar Sélestat reka lestina í deildinni án stig eftir sex leiki.
- Fredrikstad Bkl., liðið sem Elías Már Halldórsson þjálfari í norsku úrvalsdeildinni, tapaði í heimsókn sinni til Molde í gær, 34:27. Alexandra Líf Arnarsdóttir lék með Fredrikstad Bkl. í leiknum er skoraði ekki mark. Fredrikstad Bkl. er í fimmta sæti deildarinnar með sex stig eftir sjö leiki.
- Alpla Hard, liðið sem Hannes Jón Jónsson þjálfar, vann Krems á útivelli, 26:24, í toppslag austurrísku 1. deildarinnar í handknattleik í gær. Hard komst þar í efsta sæti deildarinnar. Liðið hefur 13 stig að loknum sjö leikjum. Kremsmenn eru stigi á eftir.
- Daníel Freyr Andrésson varði eitt skot af níu sem hann fékk á sig þann tíma sem hann stóð í marki Lemvig í átta marka tapi liðsins, 34:26, á heimavelli gegn Skanderborg Aarhus í dönsku úrvalsdeildinni í handknattleik í gærkvöld. Vilhelm Poulsen skoraði tvö mörk fyrir Lemvig en liðið er í hópi þeirra neðstu með tvö stig átta leiki.
- Auglýsing -