KA-menn unnu austurríska liðið HC Fivers með eins marks mun, 30:29, í æsispennandi fyrri viðureign liðanna í annarri umferð Evrópubikarkeppni karla í handknattleik í Sporthalle Hallgasse i Vínarborg í kvöld. HC Fivers var þremur mörkum yfir að loknum fyrri hálfleik, 15:12.
Síðari viðureign liðanna verður á sama stað á morgun og hefst hún klukkan 16.15, að íslenskum tíma.
KA-menn áttu lengi vel erfitt uppdráttar í fyrri hálfleik og lentu m.a. fimm mörkum undir um skeið, 13:8. Með þremur mörkum í röð komst KA inn í leikinn aftur og Einar Rafn Eiðsson sá til þess að aðeins þriggja marka munur var í hálfleik, 15:12. Einar Rafn skoraði úr vítakasti þegar leiktíminn var úti.
KA-liðið lék af miklum krafti strax frá byrjun síðari hálfleiks og minnkaði fljótlega muninn í eitt mark. Eftir nokkrar tilraunir tókst KA loks að komast yfir, 20:19, þegar 19 mínútur voru eftir og aftur 21:20. Leikmenn HV Fivers voru ekki af baki dottnir. Þeir komust yfir, 24:22. Leikmenn KA lögðu hinsvegar ekki árar í bát. Þeir sneru við taflinu og komust yfir. Bruno Bernat fór á kostum í markinu og sóknarleikurinn gekk vel til viðbótar við varnarleikinn. KA hélt eins til tveggja marka forystu síðustu tíu mínúturnar og vann góðan sigur.
Mörk KA: Einar Rafn Eiðsson 9, Dagur Gautason 8, Gauti Gunnarsson 5, Allan Norðberg 4, Einar Birgir Stefánsson 2, Arnór Ísak Haddsson 1, Dagur Árni Heimisson 1.
Varin skot: Bruno Bernat 8, 61,5% – Nicholas Satchwell 6, 20%.
Handbolti.is fylgdist með leiknum í textalýsingu hér fyrir neðan.
