Íslenska landsliðið vann færeyska landsliðið örugglega í síðari vináttuleik helgarinnar í Klaksvík í kvöld, 27:22, eftir að hafa verið sjö mörkum yfir í hálfleik, 15:8. Sigurinn í dag var afar öruggur. Færeyska liðið komst aldrei með tærnar þar sem það íslenska hafði hælana. Á talsverðum kafla í síðari hálfleik var forskot íslenska liðsins níu til tíu mörk.
Upphafskaflinn var mjög góður hjá íslenska liðinu. Það skoraði fyrstu fimm mörkin. Færeyingar skoruðu ekki sitt fyrsta mark fyrr en eftir liðlega 11 mínútur. Segja má að þessi góða byrjun hafi gefið tóninn. Varnarleikur og markvarsla var mjög góð og sóknarleikurinn var hraður og beittur. Mikil einbeiting var í íslenska liðinu sem gaf ekki þumlung eftir fyrr en á síðustu tíu mínútunum þegar færeyska liðið náði aðeins að klóra í bakkann.
Frammistaðan gefur góð fyrirheit vegna leikjanna tveggja við Ísrael í forkeppni HM um næstu helgi á Ásvöllum.
Eins og í gær fengu allir 16 leikmenn íslenska liðsins að taka þátt.
Mörk Íslands: Díana Dögg Magnúsdóttir 6, Sandra Erlingsdóttir 4/3, Steinunn Björnsdóttir 4, Andrea Jacobsen 3, Rut Arnfjörð Jónsdóttir 3, Katrín Tinna Jensdóttir 2, Thea Imani Sturludóttir 2, Aldís Ásta Heimisdóttir 1, Hafdís Renötudóttir 1, Perla Ruth Albertsdóttir 1.
Varin skot: Hafdís Renötudóttir 8, 44,4% – Sara Sif Helgadóttir 3, 20%.
Mörk Færeyja: Maria P. Nólsoy 8, Maria H. Weyhe 4, Lív B. Zachariassen 3, Brynhild Pállsdóttir 2, Jana Mittún 2, Marianna G. Eystberg 1, Pernille Brandenborg 1, Lív S. Poulsen 1.
Nokkrar myndir frá leiknum í dag. Smellið á myndirnar til þess að sjá þær stærri.
Handbolti.is fylgist með leiknum í textalýsingu hér fyrir neðan.
