- Auglýsing -
- Landslið Alsír, sem verður með íslenska landsliðnu í riðli á HM í Egyptalandi, tapaði fyrir rússneska landsliðinu, 30:24, á æfingamóti í Póllandi í gærkvöld. Rússar voru ekki með fullskipað lið í leiknum þar sem einhverjir leikmenn landsliðsins eru meiddir og aðrir eru með liðum í úrslitakeppni Meistaradeildarinnar sem hefst í kvöld. Mótið í Póllandi heldur áfram í dag.
- Danska úrvalsdeildarliðið TTH Holstebro sem Óðinn Þór Ríkharðsson leikur með hefur samið við norska markvörðinn Sander Heieren sem er nú liðsmaður Drammen í Noregi. Heieren er 22 ára gamall og er af mörgum talinn vera framtíðar markvörður norska landsliðsins. Hann flytur til Danmerkur sumarið 2022. Ekki er ráð nema í tíma sé tekið.
- Danski hornamaðurinn Magnus Landin leikur ekki með Kiel í úrslitahelgi Meistaradeildarinnar í dag og á morgun. Hann veiktist af kórónuveirunni á dögunum og hefur ekki jafnað sig.
- Spánverjar og Túnisbúar gerðu jafntefli, 30:30, á æfingamóti í handknattleik í gær. Spænska landsliðið var án leikmanna Barcelona þar sem þeir eru í Köln til þess að taka þátt í úrslitaleikjum Meistaradeildar. Á sama móti vann landslið Katar landslið Argentínu, 24:22.
- Auglýsing -
