- Auglýsing -
- Tryggvi Þórisson og samherjar í Sävehof komust upp í annað sæti í sænsku úrvalsdeildinni með sigri á Lugi, 29:20, á heimavelli. Tryggvi lék með Sävehof en skoraði ekki að þessu sinni. Sävehof hefur 12 stig að loknum átta leikjum og er stigi fyrir ofan IFK Skövde sem tapaði á heimavelli fyrir IF Hallby HK, 32:26. Bjarni Ófeigur Valdimarsson skoraði þrjú af mörkum Skövdeliðsins.
- Ásgeir Snær Vignisson skoraði eitt mark þegar Helsingborg tapaði fyrir efsta liði sænsku úrvalsdeildarinnar, IFK Kristianstad, 29:25, í Helsingborg. Eftir góða byrjun í deildinni er Helsingborg fallið niður í 10. sæti með stigin sín sjö.
- Ingibjørg Olsen leikmaður ÍBV skoraði tvö mörk fyrir færeyska landsliðið sem tapaði fyrir landsliði Kósovó í fyrri leik þjóðanna í forkeppni heimsmeistaramóts kvenna í Istog í Kósovó í gærkvöld, 27:24. Síðari viðureignin verður á sama stað á laugardaginn.
- Svíinn Per Johansson, landsliðsþjálfari Hollands í handknatteik kvenna, fór ekki með liði sínu til Skopje í Norður Makedóníu í gær. Vegabréf hans var við það að renna út og ljóst að hann fengi tæplega að koma inn fyrir landamæri Norður Makedóníu. Þess vegna fór Johansson heim til Svíþjóðar til að fá endurnýjað vegabréf. Vonast hann til þess að geta farið til Skopje í dag, í síðasta lagi snemma í fyrramálið. Hollenska landsliðið leikur sinn fyrsta leik á EM á annað kvöld.
- Því var haldið fram á þýskum vefmiðlum í gær að sænski hornamaðurinn hjá dönsku meisturunum GOG, Jerry Tollbring, hafi hafnað tilboði frá SC Magdeburg en hyggist semja við Füchse Berlin fyrir næsta keppnistímabil. Tollbring þekkir vel til í Þýskalandi eftir nokkurra ára veru hjá Rhein-Neckar Löwen.
- Auglýsing -
