Arnór Atlason hefur skrifað undir nýjan tveggja ára samning við danska meistaraliðið Aalborg Håndbold um að sinna áfram starfi aðstoðarþjálfara liðsins. Nýi samningurinn gildir fram til ársins 2023.
Arnór hefur verið aðstoðarþjálfari Aalborg-liðsins frá sumrinu 2018 þegar hann lagði keppnisskóna á hilluna eftir langan og glæsilegan handknattleiksferil á Íslandi, Þýskalandi, í Frakklandi en lengst af í Danmörku.
Eftir að Arnór kom inn í þjálfarateymi Aalborg-liðsins hefur liðið í tvígang orðið danskur meistari, unnið bikarkeppnina einu sinni og orðið meistari meistaranna tvisvar sinnum.
Arnór hefur unnið mjög náið með Stefan Madsen aðalþjálfara liðsins. Hafa þeir náð afar vel saman en Madsen tók við af Aroni Kristjánssyni sem stýrði Álaborgarliðinu með afar góðum árangri um árabil.
„Ég er í sjöunda himni yfir að Arnór heldur áfram að vera hluti af okkar hóp. Hann býr yfir gríðarlegri reynslu frá sínum leikmannaferli sem leikmenn liðsins hafa notið og njóta áfram góðs af. Til viðbótar þá vinna Arnór og Stefan afar vel saman. Við erum stoltir yfir að geta haldið þessu sterka þjálfarateymi við stjórnvölin hjá okkur,“ segir Jan Larsen, framkvæmdastjóri Aalborg Håndbold m.a. í fréttatilkynningu félagsins í gærkvöld.
Samhliða starfi sínu hjá Aalborg verður Arnór áfram þjálfari U19 ára landsliðs Danmerkur í karlaflokki.
