Stjarnan vann stórsigur á Selfossi

Stjörnumenn unnu stórsigur á Selfossliðinu í Sethöllinni 9. umferð Olísdeildar karla í handknattleik í Sethöllinni í kvöld. Lokatölur voru 35:22 en Stjarnan var fimm mörkum yfir að loknum fyrri hálfleik, 15:10. Stjörnuliðið lék afar vel og náði nú afar heilsteyptri frammistöðu frá upphafi til enda.

Stjarnan var með tögl og hagldir nær allan fyrri hálfleikinn og færði sig frekar upp á skaftið þegar á leið. Voru leikmenn liðsins með verðskuldaða forystu í hálfleik. Varnarleikurinn var til fyrirmyndar og hröð upphlaup skiluðu góðum mörkum.

Ekki tókst heimamönnum að blása til sóknar í upphafi síðari hálfleiks. Þvert á móti. Stjörnumenn hertu róðurinn og juku forskot sitt á kostnað heimamanna. Selfyssingar virtust ekki eiga nein svör og löngu var ljóst áður en nær dró leikslokum að Stjarnan færi með sigur úr býtum. Aðeins var spurning um hversu stór sigurinn yrði.

Stjarnan sýndi svo sannarlega að þessu sinni hvers hún er megnug. Nokkuð sem maður hefur saknað í mörgum leikjum liðsins til þessa í deildinni. Með sigrinum fór Stjarnan upp á milli Aftureldingar og ÍBV með 11 stig eftir níu leiki. Selfoss er í sjöunda sæti með níu stig eftir tvo tapleiki í röð. Stöðuna í deildinni er að finna neðst í greininni.

Mörk Selfoss: Guðmundur Hólmar Helgason 5, Ísak Gústafsson 5/1, Einar Sverrisson 4/1, Atli Ævar Ingólfsson 3, Hannes Höskuldsson 3, Tryggvi Sigurberg Traustason 1, Sæþór Atlason 1.
Varin skot: Vilius Rasimas 12/2, 31,6% – Jón Þórarinn Þorsteinsson 2, 22%.
Mörk Stjörnunnar: Hergeir Grímsson 6, Þórður Tandri Ágústsson 6, Starri Friðriksson 5/3, Arnar Freyr Ársælsson 4, Björgvin Þór Hólmgeirsson 4, Tandri Már Konráðsson 4, Leó Snær Pétursson 3, Gunnar Steinn Jónsson 2, Brynjar Hólm Grétarsson 1.
Varin skot: Adam Thorstensen 14, 40% – Arnór Freyr Stefánsson 2/2, 50%.

Staðan í Olísdeild karla: