Ófærð setur aftur strik í reikning bikarkeppninnar

Viðureign ÍBV og KA/Þórs í 16-liða úrslitum bikarkeppni kvenna í handknattleik sem til stóð að færi fram í Vestmannaeyjum í dag og hæfist klukkan 17.30 hefur verið frestað um sólarhring.

Veður gerir að verkum að ófært er með flugi á milli Akureyrar og Vestmannaeyja í dag, segir í tilkynningu frá mótanefnd HSÍ.

Stefnan hefur verið sett á að gera þriðju atlögu að leiknum klukkan 17.30 á morgun, miðvikudag, segir ennfremur í tilkynningunni.

Upphaflega stóð til að liðin leiddu saman kappa sína á þriðjudaginn í síðustu viku. Þá eins og nú setti veður strik í reikninginn.