Skarð hefur verið hoggið í raðir í karlalið Vals þegar aðeins er rúm vika er þangað til keppni hefst í Olísdeild karla. Einn af yngri og efnilegri leikmönnum liðsins, Arnór Snær Óskarsson, er ristarbrotinn og verður frá keppni og æfingum í nokkrar vikur af þeim ástæðum. Arnór Snær staðfesti þetta þegar handbolti.is náði í hann áðan.
„Ég ristarbrotnaði á æfingu á laugardaginn og fer í aðgerð í næstu viku,“ sagði Arnór Snær sem var eðlilega vonsvikinn yfir því sem kom fyrir, svo skömmu áður en Íslandsmótið hefst. Nærri hálft ár er liðið síðan hann og félagar hans í Val léku síðast opinberan kappleik. Undirbúnings- og biðtíminn hefur verið langur. „Þetta er ömurlegt og slæmt að þetta skulu gerast svona rétt áður en mótið skellur á,“ sagði Arnór Snær ennfremur.
Hann sagði ekki ljóst hversu lengi hann verði frá keppni en reiknar með a.m.k. fjórum til sex vikum frá aðgerð þar sem brotið verið neglt saman. „Hversu lengi ég verð úr leik skýrist væntanlega þegar aðgerðin verður að baki,“ sagði örvhenta skyttan unga sem hefur átt sæti í yngri landsliðum Íslands á síðustu árum
