Hjá Stjörnunni til 2023

Línukonan Elena Birgisdóttir hefur skrifað undir áframhaldandi samning við handknattleikslið Stjörnunnar sem gildir út leiktíðina vorið 2023.

Í tilkynningu frá Stjörnunni segir m.a. að Elena hafi átt stóran þátt í velgengni Stjörnuliðsins í gegnum árin. Hún hefur spilað ófáa úrslitaleikina og varð deildar,- og bikarmeistari 2017 með Stjörnuliðinu.

„Elena er mikill karakter, er hvetjandi og skemmtileg innan sem utan vallar. Það er mikill fengur fyrir Stjörnuna að Elena sjái framtíð sína hjá félaginu næstu árin,“ segir orðrétt í tilkynningu handknattleiksdeildar Stjörnunnar.

Elena lék með Förde í Noregi keppnistímabilið 2018/2019.