Ekkert verður af fyrirhuguðum leik Færeyinga og Tékka í undankeppni EM karla í handknattleik karla sem til stóð að færi fram i Höllinni á Hálsi í Þórshöfn í kvöld. Færeyska handknattleikssambandið tilkynnti fyrir hádegið að leikmenn innan tékkneska landsliðsins hafi greinst smitaðir af kórónuveirunni. Þeir voru skimaðir við komuna til Vágaflugvallar í gær. Seint í gærkvöldi hafi niðurstaðan legið fyrir.
Tékkneski hópurinn hefur dvalist í sóttkví frá því að hann kom til Færeyja í gær. Hann fer frá Færeyjum síðar í dag.
Að höfðu samráði við Handknattleikssamband Evrópu, EHF, var ákveðið að fresta leiknum. Ekki var gefið upp hversu margir voru greindir smitaðir en ljóst er að hvert smit getur verið alvarlegt í hópi manna sem halda sig að mestu saman utan sem innan æfinga. Til stendur að landslið þjóðanna leiði saman hesta sína í Tékklandi um helgina. Harla ólíklegt er að af þeirri viðureign verði.
Upphaflega áttu leikir Færeyinga og Tékka að fara fram í nóvember en var þá frestað vegna mikillar útbreiðslu kórónuveirunnar í Tékklandi.
Vika er þangað til flautað verður til leiks á HM í Egyptalandi. Tékkar verða á meðal þátttökuþjóða á mótinu. Eins og kom fram á handbolti.is í morgun þá greindust þjálfarar tékkneska landsliðsins Daniel Kubes og Jan Filip smitaðir fyrir nokkrum dögum og hafa ekki þjálfað liðið síðustu daga.
Ekki kemur fram hversu margir úr tékkneska hópnum greindust smitaðir í Færeyjum í gær en ljóst er að þetta eru ekki góð tíðindi fyrir Tékka svo skömmu fyrir HM.
