- Auglýsing -
- Vilmar Þór Bjarnason var annar vallaþulurinn á leik ÍBV og Madeira Anderbol í 3. umferð Evrópubikarkeppni kvenna í handknattleik á Madeira í gær. Vilmar Þór er með Eyjaliðinu í för og því þótti gráupplagt til þess að fá hann til þess að kynna leikmenn ÍBV til leiks eins og honum einum er lagið.
- Aldís Ásta Heimisdóttir og Ásdís Guðmundsdóttir skoruðu tvö mörk hvor og Jóhanna Margrét Sigurðardóttir eitt þegar lið þeirra Skara HF tapaði fyrir Skuru IK, 34:28, á heimavelli í gær í sænsku úrvalsdeildinni í handknattleik. Staðan var jöfn í hálfleik, 18:18.
- Leikmenn Skara HF misstu leikinn úr höndum sér á fyrsta stundarfjórðungi síðari hálfleiks. Að honum loknum var Skuruliðið komið með átta marka forskot, 28:21. Skara er í 11. sæti af 12 liðum deildarinnar með fjögur stig eftir sjö leiki. Stutt er hinsvegar í liðin um miðja deildina sem eru með sex stig.
- Díana Dögg Magnúsdóttir og samherjar í BSV Sachsen Zwickau féllu í gær úr leik í 16-liða úrslitum þýsku bikarkeppninnar þegar liðið tapaði fyrir HL Buchholz 08-Rosengarten, 33:27, á heimavelli. Díana Dögg skoraði sjö mörk, átti sex stoðsendingar, skapaði fjögur færi og vann tvö vítaköst. Eins vann hún mótherja sína tvisvar af leikvelli.
- Sara Odden, fyrrverandi leikmaður Hauka, skoraði ekki mark fyrir BSV Sachsen Zwickau en var aðsópsmikil í vörninni og var m.a. tvisvar vísað af leikvelli.
- Oddur Gretarsson skoraði átta mörk, þar af þrjú úr vítaköstum, fyrir Balingen-Weilstetten gegn Eisenach í toppslag þýsku 2. deildarinnar í handknattleik í gærkvöld. Liðin skildu jöfn, 26:26. Balingen er efst í deildinni með 26 stig eftir 14 leiki og er sex stigum á undan Eisenach. Daníel Þór Ingason skoraði tvö mörk fyrir Balingen.
- Óðinn Þór Ríkharðsson skoraði átta mörk, þar af þrjú úr vítaköstum, í jafntefli, 31:31, Kadetten Schaffhausen við Suhr Aarau á heimavelli í gær í svissnesku A-deildinni í handknattleik. Óðinn Þór jafnaði metin í lok leiksins úr vítakasti. Hann reið einnig baggamuninn fyrir Kadetten í Evrópudeildinni á þriðjudagskvöldið. Kadetten Schaffhausen, sem Aðalsteinn Eyjólfsson þjálfar, er fallið niður í annað sæti deildarinnar með 28 stig eftir 18 leiki. HC Kriens með Andy Schmid í broddi fylkingar er komið í efsta sæti með 30 stig að loknum 17 leikjum.
- Roland Eradze og félagar í HC Motor unnu Potsdam, 33:27, á útivelli í þýsku 2.deildinni í handknattleik í gærkvöld. Þetta var þriðji sigur HC Motor í deildinni en liðið er næst neðst.
- Auglýsing -