Unglingalandsliðskonan í handknattleik, Katrín Anna Ásmundsdóttir, hefur samið til tveggja ára við Handknattleiksdeild Gróttu. Katrín Anna er örvhent og leikur aðallega í hægra horni og er nú að taka þátt í sínu fjórða keppnistímabili með Gróttu í Grill 66-deildinni.
Katrín Anna hefur verið einn besti leikmaður Gróttuliðsins undanfarin ár og var meðal annars markahæsti leikmaður liðsins í fyrra með 106 mörk í 20 leikjum. Hún hefur þegar skorað 35 mörk í sjö leikjum með liðinu í Grill 66-deildinni á yfirstandandi leiktíð.
Katrín Anna hefur verið fastamanneskja í unglingalandsliðum HSÍ. Í sumar lék hún með U18 ára landsliðinu sem náði þeim frábæra árangri að enda í 8. sæti á HM í Skopje í Norður Makedóníu.
„Það eru miklar gleðifréttir að Katrín Anna hafið samið við félagið og leiki í Gróttutreyjunni út tímabilið 2024,“ segir í tilkynningu frá handknattleiksdeild Gróttu.
