Skoraði fyrsta markið fyrir landsliðið

Viktor Gísli Hallgrímsson, markvörður, skoraði sitt fyrsta mark fyrir A-landsliðið í handknattleik í leiknum við Portúgal í Porto í gærkvöld en um var að ræða hans 19. A-landsleik.

Viktor Gísli skoraði markið eftir 25 mínútur og 40 sekúndur í leiknum. Með því minnkaði hann muninn í tvö mörk, 11:9. Eftir að hafa varið boltann kastaði Viktor Gísli rakleitt yfir völlinn áður en Alfredo Quintana hafði ráðrúm til þess að komast í mark portúgalska liðsins. Quintana hafði verið kallaður af leikvelli svo portúgalska liðið gæti leikið með sjö leikmenn í sókninni eins og það gerði á köflum í leiknum í gær.