- Auglýsing -
- Jónína Hlín Hansdóttir og samherjar hennar í slóvakíska liðinu MKS Iuventa Michalovce mæta KPR Gminy Kobierzyce frá Póllandi í 16-liða úrslitum Evrópubikarkeppni kvenna í handknattleik en dregið var í gærmorgun. Leikirnir fara fram í fyrri hluta janúar. MKS Iuventa Michalovce vann sænska liðið Lugi örugglega í 32-liða úrslitum sem lauk um síðustu helgi. Jónína Hlín tók ekki þátt í leikjunum við Lugi. Hún fór til Slóvakíu í haust til háskólanáms og gekk um leið til liðs við MKS Iuventa Michalovce en Jónína Hlín varð Íslandsmeistari með Fram í vor.
- Kátína ríkir á skrifstofu Handknattleikssambands Íslands þessa dagana eftir að spurnir bárust af því að HM-treyja landsliðsins sé væntanleg þangað á allra næstu dögum svo hægt verði að hefja sölu á henni mánudaginn 19. desember. Treyjan verður í karla-, kvenna- og barnastærðum, eins og undanfarin ár. Tilvalið í jólapakkann.
- Leikur Sporting og Skjern í Evrópudeildinni í handknattleik karla fór fram fyrir luktum dyrum í gærkvöld. Mikil vætutíð hefur verið í Lissabon upp á síðkasti svo að jarðvegur er víða ótraustur. Íþróttahöll Sporting er á hættusvæði og því þótti ekki forsvaranlegt að stefna áhorfendum á leikinn sem Sporting vann með fjögurra marka mun, 28:24. Sveinn Jóhannsson lék með Skjern en skoraði ekki. Allt um úrslit leikja Evrópudeildarinnar í gærkvöld og stöðuna í riðlunum fjórum er að finna hér.
- Frá og með næsta keppnistímabili verður fjölgað úr 12 í 14 lið í úrvalsdeildum karla og kvenna í Noregi. Frá þessu var greint í gær.
- Franska liðið Nantes hefur krækt í þriðja markvörðinn. Portúgalinn Manuel Gaspar hefur samið við Nantes og kemur til félagsins í næstu viku. Hann er nú leikmaður Sporting í Lissabon. Gaspar verður til halds og trausts með Viktori Gísla Hallgrímssyni og Ivan Pesic sem komu til Nantes í sumar en báðir hafa verið nokkuð frá vegna meiðsla á tímabilinu.
- Auglýsing -