Handknattleiksdeild ÍBV hefur klófest markvörð fyrir karlalið félagsins sem er ætlað að standa vaktina með Petar Jokanovic þegar flautað verður til leiks á ný í Olísdeild karla í lok janúar. Um er að ræða Hvít-Rússann Pavel Miskevich.
Miskevich, sem er 25 ára gamall, kemur til ÍBV frá spænska liðinu San Jose Lanzarote. Hann hefur skrifað undir samning við ÍBV sem gildir til loka leiktíðar í vor. Eftir það verður staðan tekin og framhaldið metið.
„Við væntum mikils af Pavel og að hann verði góð viðbót við sterkan leikmannahóp okkar, fyrir átökin í Olísdeildinni,“ segir í tilkynningu frá handknattleiksdeild ÍBV.
Um leið og nýtt ár gengur í garð verður sótt um atvinnuleyfi fyrir Miskevich. Vonir standa til að sú umsókn hafi fengið samþykki áður en keppni hefst aftur í Olísdeildinni eftir um mánuð.
