- Alfreð Gíslason hóf undirbúning þýska landsliðsins fyrir heimsmeistaramótið í gærmorgun í Hannover eftir að hafa verið hjá fjölskyldu sinni hér heima á Íslandi um jól og áramót. Þýska landsliðið mætir íslenska landsliðinu í tveimur vináttuleikjum á laugardaginn og á sunnudaginn í Bremen og Hannover. Fyrri leikurinn hefst klukkan 15.15 á laugardaginn og sá síðari klukkan 14.30 daginn eftir. Ekki er annað vitað en að RÚV sýni beint frá báðum viðureignum.
- Forráðamenn danska handknattleiksliðsins Nykøbing Falster leita nú að keppnishúsi fyrir leik liðsins í Evrópudeild kvenna sem fram á að fara 11. febrúar. Heimavöllur liðsins uppfyllir ekki kröfur sem gerðar eru til keppnishúsa Evrópudeildarinnar. Þess í stað hefur lið félagsins leikið heimaleiki sína í Arena Næstved. Nú bregður svo við að 11. febrúar verður Arena Næstved upptekin vegna úrslita í úrslitakvölds söngvakeppninnar, Dansk Melodi Grand Prix, þar sem úr því fæst skorið hver syngur lag Danmerkur í Eurovision í vor.
- Línukonan Ana Debelic hefur framlengt samning sinn við Evrópu- og Noregsmeistara Vipers Kristiansand til tveggja ára. Króatíska landsliðskonan kom til Vipers sumarið 2021 frá HC Astrakhanochka í Astrakan í Rússlandi.
- „Ég held að við séum með betra lið en oft áður,” segir norski landsliðsmaðurinn Christian O’Sullivan sem horfir bjartsýnn fram á heimsmeistaramótið í handknattleik sem hefst eftir rúma viku í Póllandi og Svíþjóð. „Leikmenn eru í góðu standi og þess vegna verður spennandi að fylgjast með okkur á mótinu. Við gerum talsverðar kröfur til okkar,“ segir O’Sullivan ennfremur á vef norska handknattleikssambandsins.
- Norska landsliðið tekur þátt í fjögurra liða móti með landsliðum Bandaríkjanna, Brasilíu og Portúgal á heimavelli 5. til 8. janúar.
- Á HM verða Norðmenn í riðli með Argentínumönnum, Norður Makedóníumönnum og Hollendingum. Leikið verður í Kraká og flautað til leiks föstudaginn 13. janúar.