Valur krækir í landsliðskonu

Landsliðskonan Thea Imani Sturludóttir hefur skrifað undir samning við handknattleikslið Vals sem gildir út tímabilið 2024.Thea kemur til Vals frá Aarhus United í Danmörku en hún lék áður með Oppsal HK og Volda í Noregi og Fylki.

Thea hefur spilað fyrir yngri landslið Íslands ásamt A-landsliðinu undanfarin ár en hún er fædd árið 1997. „Thea er góð viðbót við okkar leikmannahóp. Hún getur bæði leikið sem skytta og í horni ásamt því að vera góð í vörn. Hún er á góðum aldri með fína reynslu en um leið getur hún ennþá bætt sig sem leikmaður,” er haft eftir Ágústi Þór Jóhannssyni, þjálfara kvennaliðs Vals í tilkynningu frá félaginu.