Eftir ævintýralegan endasprett þá vann íslenska landsliðið í handknattleik það þýska með eins marks mun, 31:30, í fyrri vináttuleik þjóðanna í ÖVB-Arena í gömlu Hansaborginni Brimum í dag. Þjóðverjar voru sex mörk yfir, 23:17, þegar 15 mínútur voru til leiksloka eftir að hafa verið fjórum mörkum yfir að loknum fyrri hálfleik, 18:14.
Síðustu 15 mínúturnar voru frábærar hjá íslenska liðinu. Eftir rúmar 11 mínútur án marks skoraði Ómar Ingi Magnússon 18. mark Íslands, 23:18, eftir að Björgvin Páll Gústavsson markvörður hafði komið í veg fyrir að þýska liðið næði sjö marka forskoti. Björgvin Páll varði frábærlega á erfiðum kafla leiksins sem átti ekki hvað sístan þátt í að íslenska liðið náði að snúa við taflinu. Ýmir Örn Gíslason og Elliði Snær Viðarsson náðu afar vel saman í vörninni þegar leið á og lokuðu fyrir sóknarleik þýska liðsins. Í framhaldinu fékk íslenska liðið hraðaupphlaup og seinni bylgju sóknir þar sem Óðinn Þór Ríkharðsson geigaði ekki á skoti. Hann skoraði hvað eftir annað.
Einnig breytti innkoma Janusar Daða Smárason inn í sóknina mjög miklu. Hann lék afar vel og skoraði auk þess þrjú mörk. Leysti hann Gísla Þorgeir Kristjánsson af en Gísli Þorgeir virtist ætla sér um of að þessu sinni.
Íslenska liðið vann upp forskotið og komst yfir, 28:27, þegar fimm mínútur voru til leiksloka. Var það í fyrsta sinn frá í stöðunni 6:5, sem Ísland var yfir. Aron skoraði 31. og síðasta markið 50 sekúndum fyrir leikslok. Þjóðverjar skoruðu sitt 30. mark en náðu ekki að jafna metin.
Liðin mætast öðru sinni á morgun og þá í keppnishöllinni í Hannover. Sú viðureign hefst klukkan 14.30.
Mörk Íslands: Óðinn Þór Ríkharðsson 8, Aron Pálmarsson 5, Ómar Ingi Magnússon 5, Gísli Þorgeir Kristjánsson 4, Bjarki Már Elísson 3, Janus Daði Smárason 3, Arnar Freyr Arnarsson 1, Björgvin Páll Gústavsson 1, Elliði Snær Viðarsson 1.
Varin skot: Björgvin Páll Gústavsson 9/1, Viktor Gísli Hallgrímsson 3.
Mörk Þýskalands: Johannes Golla 6, Juri Knorr 6/3, Kai Häfner 5, Philipp Weber 4, Christoph Steinert 2, Patrick Groetzki 2, Jannik Kohlbacher 1, Runa Dahmke 1, Julian Köster 1, Luca Witzke 1, Lukas Zerbe 1.
Varin skot: Andreas Wolf 12, Joel Birlehm 4.
Handbolti.is fylgdist með leiknum í textalýsingu hér fyrir neðan.
