- Auglýsing -
Ekkert verður úr því að Erlingur Richardsson og lærisveinar hans í hollenska landsliðinu taki þátt í heimsmeistaramótinu í handknattleik karla í Egyptalandi. Hollendingar hafa beðið í startholunum síðan í fyrradag þegar kallað var í skyndi eftir landsliðum Norður-Makedóníu og Sviss eftir að Tékkar og Bandaríkjamenn hættu við þátttöku vegna kórónuveirunnar. Þar með voru Hollendingar orðnir fyrsta varaþjóð inn á HM.
Alþjóða handknattleikssambandið, IHF, hefur tilkynnt Hollendingum að ekki sé von á að fleiri landslið dragi sig úr keppni. Það þýðir að landslið Grænhöfðaeyja verður með á HM en það er fremur fámennt eftir að sjö menn innan þess að meðtöldum þjálfara og starfmönnum greindust með kórónuveiruna á dögunum þar sem liðið var við æfingar í Portúgal. Það sem eftir er af hópi Grænhöfðeyinga kom til Kaíró í gærkvöld og hefur fengið neikvæða niðurstöðu úr skimun sem gerð var við komuna til Egyptalands.
Landslið Grænhöfðaeyja mætir ungverska landsliðinu í fyrsta leik sínum á HM á morgun, en einnig bíður þeirra leikur við Þjóðverja og Úrúgvæa.
- Auglýsing -
