„Við erum ofar væntingum og eins og staðan er nú þá verðum við í sextán efstu sem er besti árangur sem Barein hefur nokkru sinni náð á HM,“ sagði Aron Kristjánsson landsliðsþjálfari Barein þegar handbolti.is sló á þráðinn til hans eftir annan sigur Barein á mótinu, gegn landsliði Bandaríkjanna, í fyrstu umferð fjórða milliriðils heimsmeistaramótsins í handknattleik karla. Bareinar leika í Malmö.
Barein hefur best náð 20. sæti á HM fyrir fjórum árum en þá tóku 24 lið þátt í mótinu. Á fyrsta 32-liða mótinu fyrir tveimur árum hreppti Barein 21.sætið, voru næstu á eftir íslenska landsliðiðinu.
Óheppnir með meiðsli
„Árangurinn er ennþá ánægjulegri í ljósi þess að við vorum óheppnir með meiðsli í aðdraganda mótsins. Mig vantar til dæmis sterka leikmenn sem geta leiki bæði í vörn og sókn. Fyrir vikið er hópurinn aðeins þunnskipaðri en ég hefði viljað. Þessa hefur meðal annars orðið vart í sumum leikja okkar, eins og til dæmis á móti Dönum. Leikurinn við þá bar keim þess að við vorum að dreifa álaginu til að eiga meira púður í Belgíuleikinn. Áætlun okkar gekk eftir,“ sagði Aron sem viðurkenndi að við þessar aðstæður þyrfti að velja sér andstæðinga og leggja meira púður í þá leiki þar sem von er um sigur.
Við ramman reip að draga
Barein gerði jafntefli við Túnis í fyrstu umferð riðlakeppninnar og vann síðan Belga í þriðju og síðustu umferðinni. Sigur í gær á Bandaríkjunum í fyrstu umferð riðlakeppninnar kemur Barein í fjórða sætið af sex liðum í milliriðli eitt. Næstu tveir leikir verða við Króata og Egypta. Þar sem við ramman reip verður vafalaust að draga fyrir leikmenn Barein. „Það léttir okkur ekki róðurinn að í leiknum við Bandaríkin misstum við út vinstri hornamann okkar sem einnig er mjög góður bakvörður í vörninni. Hann verður að minnsta kosti ekki með okkur í næsta leik en kannski í síðustu umferðinni á mánudagskvöldið þegar við mætum Króötum.“
Rökrétt framhald
Segja má að árangur Barein á HM sé rökrétt framhald af Ólympíuleikunum í Tókýó sumarið 2021 þegar liðið komst í átta liða úrslit í fyrsta sinn í sögunni. Aron segir að það hafi verið ákveðinn lykill að árangri í mótinu að koma Túnisbúum í opna skjöldu í fyrstu umferðinni og ná jafntefli. Það var dýrmætt stig þegar upp var staðið. „Túnisbúarnir hafa líka verið öflugur og léku til dæmis mjög vel á mótum fyrir HM. Þeim tókst ekki að sýna sitt rétta andlit á mótinu og var þeim nokkuð áfall að gera jafntefli við okkur,“ sagði Aron sem hefur verið meira og minna með liðið við æfingar og keppni síðan í nóvember.
HM 2023 – Milliriðlar, leikjadagskrá, staðan
