Ekki smit í íslenska hópnum -hert á skimunum á HM

Allir í íslenska landsliðshópnum á HM í Egyptalandi, leikmenn, þjálfarar og starfsmenn fengu neikvæða niðurstöðu úr skimun sem hópurinn gekkst undir í gærkvöld. Róbert Geir Gíslason, framkvæmdastjóri HSÍ, fékk tilkynningu um þetta fyrir stundu. Um var að ræða svokallað PCR-test þar sem sýni eru tekin úr hálsi og nefi.

Frá og með morgundeginum verður reglum varðandi skimun breytt og þær hertar verulega. Framvegis verða leikmenn, þjálfarar og allir starfsmenn liðanna að fara í PCR-test einu sinni á sólarhring. Dómarar og eftirlitsmenn og fleiri sem við mótið starfa búa einnig við þessar hertu reglur. Til stóð að allir þátttakendur mótsins færu í skimun á 72 klst fresti.

Alþjóða handknattleikssambandið sendi tilkynningu um breytinguna til forráðamanna þátttökuþjóða HM fyrr í dag.