Talsvert hefur hallað undan fæti hjá íslenska landsliðinu í handknattleik karla eftir því sem liðið hefur á daginn þegar litið er til röðunar í sæti á heimsmeistaramótinu. Í morgun var íslenska landsliðið í 10. sæti en eftir að Króatar og Serbar unnu sína leiki í kvöld er orðið víst að hlutskipti íslenska landsliðsins verður að hafna í 12. sæti. Um leið má telja að litlar líkur séu á að íslenska landsliðið komist í forkeppni Ólympíuleikanna út á 12. sæti á HM, þótt menn vilji vitanlega vera bjartsýnir.
Króatar unnu landslið Barein, sem Aron Kristjánsson þjálfar, 42:32, í milliriðli fjögur í kvöld. Króatar ljúka keppni með sjö stig í fjórða milliriðli og skjótast upp fyrir Slóvena sem voru í níunda sæti. Slóvenar féllu niður um eitt sæti.
Serbar unnu Hollendinga, 32:30, á sama tíma og Króatar lögðu Bareina. Sigurinn dugði Serbum til þess að vera með hagstæðari markatölu en Ísland þegar leikir milliriðla eru gerðir upp. Ellefta sætið fellur þar með í skaut Serba en íslenska landsliðið verður að gera sér að góðu 12. sætið. Neðar getur íslenska liðið ekki orðið þar sem sætum fyrir neðan hefur verið ráðstafað alveg niður í það 24.
Næstir á eftir Íslandi eru Portúgal, Holland, Pólland, Barein, Brasilía, Svartfjallaland, Argentína, Bandaríkin, Belgía, Katar, Grænhöfðaeyjar og Íran í 24. sæti.
Þegar forsetakeppnin hefur verið leidd til lykta á miðvikudaginn liggur fyrir hvaða lið hafna í 25. til 32. sæti.
Í kvöld fæst úr því skorið hvaða lið mætast á miðvikudaginn í átta liða úrslitum HM. Síðustu leikir riðlakeppninnar hefjast innan skamms.
HM 2023 – Milliriðlar, leikjadagskrá, staðan
