- Auglýsing -
- Elías Már Halldórsson hrósaði sigri með liði sínu Fredrikstad Bkl. í heimsókn til Sola í gærkvöld í norsku úrvalsdeildinni í handknattleik kvenna í gærkvöld, 26:25. Alexandra Líf Arnarsdóttir er leikmaður Fredrikstad Bkl. Hún skoraði ekki í leiknum í gær. Fredrikstad Bkl. er í sjöunda sæti af 12 liðum deildarinnar en Sola er í fjórða sæti.
- Rakel Sara Elvarsdóttir skoraði tvö mörk og Dana Björg Guðmundsdóttir eitt þegar lið þeirra Volda tapaði fyrir Fana með 11 marka mun á heimavelli í norsku úrvalsdeildinni í gærkvöld, 29:18 eftir að hafa verið fjórum mörkum undir í hálfleik, 14:10. Katrín Tinna Jensdóttir var föst fyrir í vörn Volda sem rekur lestina í deildinni.
- Halldór Stefán Haraldsson er þjálfari liðsins. Aðstoðarmaður hans, Hilmar Guðlaugsson, tilkynnti í gær að hann láti af störfum í vor um leið og Halldór Stefán. Hilmar segir í færslu á Facebook að hugur hans og fjölskyldu stefni nær ættmennum heima á Íslandi.
- Axel Stefánsson er annar tveggja þjálfara Storhamar sem vann Molde, 27:25, á heimavelli Molde í gær. Storhamar er í öðru sæti norsku úrvalsdeildarinnar með 20 stig eftir 13 leiki.
- Elín Jóna Þorsteinsdóttir náði sér ekki á strik í marki Ringkøbing Håndbold þegar liðið sótti Horsens heim í gærkvöld og tapaði, 31:27, í dönsku úrvalsdeildinni í handknattleik í gærkvöld. Elín Jóna varði 3 skot, 15%, á þeim tíma sem hún stóð í markinu í leiknum. Ringkøbing er í 11. sæti af 13 sem eftir eru í deildinni.
- Steinunn Hansdóttir skoraði þrjú mörk fyrir Skanderborg Håndbold í 11 marka tapi fyrir meisturum Odense Håndbold, 38:27, í dönsku úrvalsdeildinni í gærkvöld. Skanderborg rekur sem fyrr lestina í deildinni.
- Mikkel Hansen lék sinn 250. landsleik fyrir Danmörku í gærkvöld þegar Danir unnu Ungverja í átta liða úrslitum heimsmeistaramótsins í Stokkhólmi, 40:23. Í síðustu viku rauf Niklas Landin markvörður 250 leikja múrinn. Fjórir danskir landsliðsmenn hafa leikið 250 landsleiki í karlaflokki. Til samanburðar má geta þess að 10 Íslendingar hafa náð þessum áfanga.
- Fredericia, handknattleiksliðið sem Guðmundur Þórður Guðmundsson þjálfar, hefur samið við markvörðinn Sebastian Frandsen. Hann kemur til félagsins í sumar að lokinni dvöl hjá Porto. Frandsen er 28 ára gamall og hefur áður leikið með Ribe-Esbjerg, Bjerringbro-Silkeborg og TTH Holstebro. Þrír markverður eru þegar á fóðrum hjá Fredericia, Emil Tellerup, Thorsten Fries og Kim Sonne-Hansen. Sá síðastnefndi kom til félagsins í vetur. Einhver af þremenningunum verður væntanlega að taka hatt sinn og staf í vor.
- Auglýsing -
