Þór Akureyri hefur rift samningi við króatísku skyttuna Josip Vekic. Árni Rúnar Jóhannesson, formaður handknattleiksdeildar Þórs, staðfesti það við handbolta.is í dag.
Vekic stóð ekki undir væntingum og þess vegna var ákveðið að leiðir hans og Þórs skildu áður en þráðurinn verður tekinn upp aftur í Grill 66-deildinni eftir hlé.
Vekic kom til Þórs síðla í september og lék alls 11 leiki í Grill 66-deildinni og skoraði 51 mark. Veikic var áður í herbúðum Vardar í Skopje.
Þór hefur ekki leikið í Grill 66-deildinni síðan nokkru fyrir jól vegna þess að línumaðurinn Kostadin Petrov var í landsliði Norður Makedóníu sem tók þátt í HM í Póllandi og Svíþóð og lauk ekki keppni fyrr en í gær.
Fyrsti leikur Þórs á nýju ári verður föstudaginn 3. febrúar í Hölllinni á Akureyri þegar efsta lið Grill 66-deildar, HK, kemur í heimsókn.
Staðan og næstu leikir í Grill 66-deildunum.
