- Auglýsing -
- Jakob Lárusson hafði betur í gær þegar íslensku þjálfararnir mættust með lið sín í færeysku úrvalsdeildinni í handknattleik kvenna. Kyndill, sem Jakob þjálfar, sótti EB heim og vann með átta marka, 32:24.
- Kristinn Guðmundsson er þjálfar EB frá Eiði. Kyndill er í öðru sæti deildarinnar með 23 stig eftir 15 leiki, er fjórum stigum á eftir H71 sem virðist vera með besta liðið núna eins og áður. EB er neðst í deildinni með fjögur stig eftir leikina 15.
- Egill Már Hjartarson skoraði tvö mörk fyrir StÍF í þriggja mark sigri á Team Klaksvík á heimavelli í færeysku úrvalsdeildinni í handknattleik karla í gær, 28:25. Leikið var í Skála og voru gestirnir frá Klaksvík marki yfir að loknum fyrri hálfleik, 14:13. StÍF er í fjórða sæti færeysku úrvalsdeildarinnar með 11 stig eftir 13 leiki. VÍF frá Vestmanna er efst með 21 stig.
- Eftir frábæra frammistöðu á heimsmeistaramótinu í handknattleik er Daninn Simon Pytlick orðinn einn allra eftirsóttasti handknattleiksmaður Evrópu. Pytlick er aðeins 22 ára gamall og leikur nú með Danmerkurmeisturum GOG á Fjóni.
- Annar danskur landsliðsmaður sem fór á kostum í úrslitaleiknum við Frakka á HM í gær er Rasmus Lauge. Vegna meiðsla hafði hann aðeins leikið í 23 mínútur á HM þegar kom að úrslitaleiknum. Lauge, sem er samherji Bjarka Más Elíssonar hjá Veszprém í Ungverjalandi, hafði ekki skorað mark í þremur markskotum á mínútunum 23 fyrir úrslitaleikinn. Hann fór hinsvegar hamförum í sóknarleik Dana í síðari hálfleik í úrslitaleiknum við Frakka og skoraði 10 mörk í 11 skotum. Lauge var meiddur og kom ekki inn í danska keppnishópinn fyrr en í átta liða úrslitum.
- Danska úrvalsdeildarliðið Fredericia Håndboldklub sem Guðmundur Þórður Guðmundsson þjálfar hefur samið við norska hornamanninn Fredrik Mossestad sem nú er samherji Bjarna Ófeigs Valdimarssonar hjá IFK Skövde.
- Auglýsing -
