Ekkert varð úr samningi Tertnes við Lovísu

Ekkert varð af því að handknattleikskonan Lovísa Thompson gengi til liðs við norska úrvalsdeildarliðið Tertnes eins og til stóð. Tertnes sagði frá komu hennar rétt fyrir miðjan desember og var þess þá getið að Lovísa léki með liðinu út keppnistímabilið í vor. Handbolti.is og fleiri fjölmiðlar hér á landi og í Danmörku sögðu frá vistaskiptunum.

Nú er komið í ljós að staðarmiðillinn Bare Åsene sagði frá því 10. janúar að ekkert verði af samningi á milli Tertnes og Lovísu.

Eftir því sem næst verður komist komu meiðsli í veg fyrir að Lovísa gerðist leikmaður Tertnes að þessu sinni.

Við leit á heimasíðu Tertnes og Facebooksíðu félagsins er ekki staf að finna í fljótu bragði um að ekkert hafi orðið úr komu Lovísu til félagsins.