Gerð verður önnur tilraun í kvöld til þess að hefja keppni á þessu ári í Olísdeild karla. Íslands- og bikarmeistarar Vals sækja þá Gróttu heim úr leik sem frestað var í 7. umferð í lok október vegna þátttöku Vals í Evrópudeildinni í handknattleik. Til stendur að flauta til leiks í Hertzhöllinni á Seltjarnarnesi í kvöld klukkan 19.30.
Bæði lið léku síðast í Olísdeildinni rétt fyrir miðjan desember. Valur átti þá reyndar eftir viðureign í Evrópudeildinni og í Poweradebikarnum. Valur er efstur í Olísdeildinni með 23 stig eftir 13 leiki. Grótta er í 9. sæti með 11 stig eftir 12 leiki. Annars er stöðuna í Olísdeildinni að finna hér.
Vonir stóðu til þess að hægt yrði að hefja keppni í Olísdeild karla á síðasta laugardag með viðureign Harðar og ÍBV á Ísafirði. Ekkert varð af leiknum vegna þess að flug féll niður á milli Reykjavíkur og Ísafjarðar. Leikurinn hefur ekki verið settur á dagskrá á nýjan leik á vef HSÍ.
Olísdeild karla:
Hertzhöllin: Grótta – Valur, kl. 19.30 – sýndur á Stöð2sport.
