Katla María ennþá markahæst – Hanna og Helena skammt á eftir

Katla María Magnúsdóttir, Selfossi, er áfram markahæst í Olísdeild kvenna þegar 14 umferðum af 21 er lokið. Katla María hefur verið markahæst nánast frá fyrstu umferð. Hún virðist kunna vel við sig í stærra hlutverki eftir að hafa snúið heim í uppeldisfélagið fyrir leiktíðina.

Hrafnhildur Hanna Þrastardóttir, sem lengi lék í treyju Selfoss, er skammt á eftir. Hanna hefur farið mikinn með ÍBV að undanförnu og virðist óðum vera að nálgast sitt fyrra form. Hún skoraði m.a. 14 mörk gegn Fram á síðasta laugardag.

Helena Rut Örvarsdóttir, úr Stjörnunni, er sú sem skoraði hefur flest mörk í Olísdeild kvenna á leiktíðinni, að frádregnum vítaköstum. Helena Rut hefur verið á siglingu allt tímabilið og skorað 98 mörk, ekkert úr vítaköstum, að jafnaði sjö mörk í leik með þrumuskotum eða eftir gegnumbrot.

Hér fyrir neðan er listi yfir þær sem skorað hafa 40 mörk eða fleiri í Olísdeild kvenna þegar tveir þriðju hlutar deildarkeppninnar eru að baki. Listinn er unninn upp úr handboltamælaborði Expectus sem m.a. er að finna hjá handbolti.is undir flipanum staðan og leikir. Handboltamælaborð Expectus notar upplýsingar frá HBStatz.