- Auglýsing -
- Aron Pálmarsson lék mjög vel og var talinn vera besti leikmaður Aalborg Håndbold í gær þegar liðið vann Danmerkurmeistara GOG, 30:26, í dönsku úrvalsdeildini að viðstöddum 5.000 áhorfendum í Gigantium í Álaborg. Aron skoraði sex mörk úr átta skotum og átti þrjár stoðsendingar. Hann var markahæsti leikmaður liðsins. Aalborg er þar með efst í deildinni með 33 stig eftir 19 leiki. GOG er tveimur stigum á eftir.
- Guðmundur Þórður Guðmundsson gat verið kátur í gær eftir að hann stýrði Fredericia Håndboldklub til sigurs á heimavelli á neðsta liði dönsku úrvalsdeildarinnar, HC Midtjylland, 29:27. Einar Þorsteinn Ólafsson var í liði Fredericia Håndboldklub en virtist ekki koma mikið við sögu. Fredericia Håndboldklub er í áttunda sæti deildarinnar.
- Tryggvi Þórisson skoraði eitt mark og var einu sinni vísað af leikvelli þegar lið hans, Sävehof, gerði jafntefli við HK Aranäs, 34:34, á útivelli í sænsku úrvalsdeildinni í gær. Sävehof er í öðru sæti deildarinnar, þremur stigum á eftir forystusauðunum í IFK Kristianstad.
- Ásgeir Snær Vignisson var ekki í leikmannahópi Helsingborg í sigri Lugi, 25:23, í Lundi í gær. Ásgeir hefur misst af síðustu leikjum liðsins vegna beinmars í hné. Helsingborg lyftist upp í 10. sæti með þessu sigri. Lugi rekur á hinn bóginn lestina af 14 liðum deildarinnar.
- Harpa Rut Jónsdóttir skoraði átta mörk og var með fullkomna nýtingu þegar GC Zürich vann SPONO EAGLES II, 43:33, í átta liða úrslitum svissnesku bikarkeppninnar í handknattleik í gær. Sunna Guðrún Pétursdóttir lék um stund í marki GC Zürich og varði þrjú skot.
- Ólafur Andrés Guðmundsson var ekki í liði GC Amicitia Zürich í gær þegar liðið vann SG Fides/Otmar St. Gallen, 33:20, í átta liða úrslitum svissnesku bikarkeppninnar. Ólafur Andrés er væntanlega enn að glíma við meiðsli sem hann varð fyrir á æfingu með íslenska landsliðinu meðan á heimsmeistaramótinu stóð í síðasta mánuði. Ólafur Andrés fékk þá þungt högg á annað lærið.
- Nikola Karabatic hefur skrifað undir nýjan samning við franska meistaraliðið PSG. Samningurinn gildir til loka leiktíðarinnar 2024. Karabatic hefur áður sagt að hann langi til að ljúka ferlinum með þátttöku á Ólympíuleikunum í Frakklandi sumarið 2024.
- Auglýsing -
