Íslands- og bikarmeistarar Vals í handknattleik karla stíga stórt skref í átta að 16-liða úrslitum Evrópudeildarinnar í handknattleik ef þeim tekst að vinna spænska liðið TM Benidorm annað kvöld í Origohöllinni. Leikurinn hefst klukkan 19.45 og mun miðasala hafa gengið vel og útlit fyrir rífandi góða stemningu á leiknum.
Valur er sem stendur í fjórða sæti B-riðils Evrópudeildarinnar þegar þrjár umferðir er óleiknar. Fjögur efstu liðin taka sæti í 16-liða útsláttarkeppni í mars.
Sigur skilar góðri stöðu
„Mikilvægi leiksins er mikið. Hér er um úrslitaleik að ræða,“ sagði Snorri Stein Guðjónsson þjálfari Vals á blaðamannfundi eftir hádegið í dag.
„Ef við vinnum erum við í góðum málum í keppninni en í vondum málum ef við töpum,“ sagði Snorri Steinn og bætti við að það væri út af fyrir sig mjög gott hjá Val að vera kominn í þá stöðu að eiga möguleika á sæti í 16-liða úrslitum. Að sama skapi þá réru allir í þá átt að komast áfram.
Forréttindi að vera í þessari stöðu
„Það eru forréttindi að vera í þeirra stöðu að ráða eigin örlögum og eiga tvo heimaleiki eftir þegar þrjár umferðir eru eftir af riðlakeppninni. Það er eitt og sér geggjuð staða að vera í til viðbótar við fá að spila í þessari Evrópukeppni og standa síðan í þeim sporum að eiga möguleika á sæti í sextán liða úrslitum. Að spila leik undir lok keppninnar undir pressu sem er jafn mikilvægur og þessi er hreint frábært. Við erum brattir og bjartsýnir,“ sagði Snorri Steinn.
Staðan í B-riðli Evrópudeildar karla:
| Flensburg | 7 | 6 | 0 | 1 | 241 – 209 | 12 |
| Ystads IF | 7 | 5 | 0 | 2 | 226 – 216 | 10 |
| PAUC | 7 | 3 | 0 | 4 | 214 – 215 | 6 |
| Valur | 7 | 2 | 1 | 4 | 228 – 235 | 5 |
| FTC | 7 | 2 | 1 | 4 | 229 – 243 | 5 |
| Benidorm | 7 | 2 | 0 | 5 | 214 – 234 | 4 |
Snúinn andstæðingur
Valur vann fyrri viðureignina sem fram fór ytra í byrjun nóvember, 32:29, og komst m.a. þar af leiðandi í þá góðu stöðu sem liðið er þegar í. Andstæðingurinn er snúinn að sögn Snorra Steins.
Nokkrar útfærslur
„Benidormliðið er gott og leikmenn er mjög erfiðir viðureignar. Liðið leikur mjög oft sjö á móti sex, ekki síst í Evrópukeppninni. Útfærslurnar eru nokkrar og framkvæmdin hjá þeim er góð. Þeir mega eiga það. Auk þess þá hafa þeir óbilandi trú á að þessi leikaðferð skili árangri. Engu máli skiptir þótt þeir fái á sig sex, sjö eða jafnvel átta mörk í bakið í autt markið. Áfram halda þeir og telja þetta vera þess virði,“ sagði Snorri Steinn.
Hann benti á að einnig leiki Benidormliðið mjög ákveðna 3/2/1 vörn. Vegna fjölbreytileika liðsins er mjög gaman að horfa á liðið leika.
Vel skólaðir í sínu skipulagi
„Þótt margt sé óvenjulegt í leik liðsins þá er ekkert til sem heitir tilviljun. Þeir eru vel skólaðir í sínu skipulagi.
Auk þess þá eru leikmenn liðsins fastir fyrir og ganga eins langt og þeir geta. Þeir eiga örugglega eftir að fara í taugarnar á einhverjum áhorfendum,“ sagði Snorri Steinn Guðjónsson þjálfari Vals sem hvetur allt handknattleiksáhugafólk til þess að mæta á leikinn annað kvöld.
Sem fyrr segir hefst leikur Vals og Benidorm í Origohöllinni klukkan 19.45 annað kvöld. Miðasala er í fullum gangi á Tix.is – smellið hér.
