Rífandi góður gangur hefur verið í miðsölu á síðari viðureign Íslands og Tékklands í undankeppni Evrópumótsins í handknattleik karla sem fram fer í Laugardalshöll á sunnudaginn og er rétt fyrir þá sem hyggjast mæta og styðja við bakið á landsliðinu í toppslag riðilsins að tryggja sér miða sem fyrst. Miðar eru seldir hjá Tix.is.
Róbert Geir Gíslason framkvæmdastjóri HSÍ var himinlifandi með miðasöluna þegar handbolti.is innti hann eftir sölunni í dag. Róbert Geir sagði að flest benti til þess að síðustu miðarnir seldust annað kvöld eða á fimmtudagsmorgun. Annað kvöld mætast landslið Tékklands og Íslands í fyrri viðureigninni í Brno en liðin kljást um efsta sætið. Viðbúið er að eftir leikinn rjúki margir upp til handa og fóta og verði sér út um miða.
Leikurinn við Tékka hefst klukkan 16 á sunnudaginn verður sá fyrsti hjá karlalandsliðinu í handknattleik í Laugardalshöll síðan í nóvemberbyrjun 2020. Þá var leikið fyrir luktum dyrum gegn Litáen í undankeppni EM 2022 en nú kann svo að fara að færri fái miða en vilja.
