Rúnar Kárason leikur með Fram á næsta keppnistímabili í Olísdeild karla. Þetta herma heimildir handbolta.is og að blaðamannafundur sem handknattleiksdeild Fram hefur boðað til á morgun snúist um að kynna endurkomu Rúnars í bláa búninginn eftir 14 ára fjarveru.
Rúnar gekk til liðs við ÍBV sumarið 2021 eftir 12 ára atvinnumennsku í Þýskalandi og Danmörku. Eftir heimkomuna hefur Rúnar verið einn öflugasti leikmaður Olísdeildar karla og markahæsti leikmaður ÍBV, bæði á síðasta keppnistímabili og á því sem nú stendur yfir.
Rúnar sem er 34 ára gamall lék upp yngri flokka Fram og var í meistaraflokki liðsins fram til 2009 þar til hann flutti til Þýskalands og gekk til liðs við Füchse Berlin og síðan með Bergischer HC, TV Großwallstadt, Rhein-Neckar Löwen og TSV Hannover-Burgdorf þangað til að hann flutti til vesturhluta Jótlands og var liðsmaður danska úrvalsdeildarliðsins Ribe-Esbjerg um þriggja ára skeið.
Rúnar á að baki 100 A-landsleiki og var m.a. markahæsti leikmaður landsliðsins á HM 2017.
