„Þetta er það sem félögin óskuðu eftir og við þeim óskum hefur verið orðið,“ sagði Róbert Geir Gíslason, framkvæmdastjóri HSÍ, þegar handbolti.is spurðu hann út í frétt frá því fyrr í dag um að einn þriðji leikja í Olísdeild kvenna verði felldur niður og leiknar 14 umferðir í stað 21.
„Ég get staðfest að þetta er rétt. Félögin óskuðu eftir þessari breytingu á Olísdeild kvenna og stjórnin varð við því. Olísdeild karla verður á hinn bóginn leikin samkvæmt áætlun með 22 umferðum fyrir úrslitakeppni,“ sagði Róbert Geir ennfremur.
Fleiri nöfn á leikskýrslu
Meðal annarra breytinga sem gerðar hafa verið er að heimila liðum að hafa nöfn sextán leikmanna á leikskýrslu í hverjum leik í stað 14. Undantekning verður gerð vegna aðstæðna sem eru uppi vegna kórónuveirunnar með það að markmiði að hægt verði að dreifa betur álagi á leikmenn en framundan er mjög þétt leikjadagskrá.
„Olísdeild kvenna er þegar hafin og eins Grill 66-deildir karla og kvenna. Flautað verður til leiks í Olísdeild karla á sunnudaginn. Boltinn er að komast á fulla ferð heima sem er gott en áfram verðum við öll að gæta afar vel að öllum sóttvörnum. Í þeim efnum má alls ekki slaka á klónni,“ sagði Róbert Geir Gíslason, framkvæmdastjóri HSÍ, með grímu fyrir vitum sér þegar handbolti.is hitti hann að máli í Kaíró í dag en Róbert Geir er fararstjóri íslenska landsliðsins á heimsmeistaramótinu.
