„Þegar á leikinn leið þá fórum við aðeins út úr skipulaginu í varnarleiknum. Fórum of framarlega og þá misstum við þær frá okkur. Það þarf að sækja leikmenn ÍBV framarlega en þó á réttum stöðum til þess að halda þeim niðri. Okkur tókst það ekki þegar kom fram í síðari hálfleikinn og þá skildu leiðir,“ sagði Díana Guðjónsdóttir þjálfari Hauka eftir tap liðsins, 30:23, fyrir ÍBV á Ásvöllum í Olísdeild kvenna í handknattleik.
Leikurinn var jafn í nærri 50 mínútur en það nægði ekki í 60 mínútna viðureign eins og gefur að skilja. Eins fóru fjögur vítaköst forgörðum hjá Haukum í kvöld sem er ekki einstakt því fimm vítaköst fóru í súginn gegn Fram á dögunum.
„Ég verð greinilega að vera með vítakeppni á hverri æfingu. Nýting okkar í vítaköstum er áhyggjumál,“ sagði Díana sem hafði skamman tíma til þess að setja mark sitt og nýráðins aðstoðarmanns, Halldórs Ingólfssonar, á Haukaliðið.
„Við erum með ungt og efnilegt lið ásamt nokkrum reyndari leikmönnum. Uppbygging stendur yfir og það er ljóst að til þess að standa í ÍBV í 60 mínútur verða allar að hitta á sinn besta dag. Við höldum áfram að byggja ofan á þetta,“ sagði Díana Guðjónsdóttir þjálfari Hauka sem getur farið að búa lið sitt undir undanúrslitaleik í Poweradebikarkeppninni á næsta miðvikudag.
Staðan í Olísdeild kvenna og næstu leikir.
