Landsliðsþjálfari Tékka í handknattleik karla, Xavier Sabate, var lagður inn á sjúkrahús skömmu eftir sigur Tékka á Íslendingum í undankeppni EM í Brno á miðvikudagskvöldið. Þetta kemur fram í tilkynningu frá Handknattleikssambandi Tékklands sem gefin var út í gær.
Jan Běloch aðstoðarþjálfari og Jan Filip fyrrverandi landsliðsþjálfari fóru með tékknesa landsliðinu í flugi frá Vínarborg í rauðabýtið í morgun og stýra undirbúningi og liðinu í leiknum ef þörf verður á.
Í fyrrgreindri tilkynningu kemur fram að ekki sé loku fyrir það skotið að Sabate stýri tékkneska landsliðinu í síðari leiknum við Ísland í Laugardalshöll á sunnudaginn. Allt velti á að Sabate jafni sig og geti ferðast til Íslands í tíma fyrir leikinn.
Ekki kemur fram hvaða veikindi herjuðu á Sabate sem knúðu hann til innlagnar á spítala. Hann mun hafa fundið til veikinda fljótlega eftir sigurinn seint á miðvikudagskvöld. Auk þess að þjálfa tékkneska landsliðið stýrir Sabate einnig pólska liðinu Wisla Plock sem er í efsta sæti pólsku úrvalsdeildarinnar og er komið í fyrstu umferð útsláttarkeppni Meistaradeildar Evrópu.
Uppfært: Handbolti.is fregnaði í kvöld að vonir standi til að Sabate komi til Íslands á morgun.
