- Auglýsing -
- Landsliðskonan Andrea Jacobsen skoraði sex mörk og var markahæst hjá EH Aalborg í gær í stórsigri á Hadsten Håndbold, 33:18, á útivelli í næst efstu deild danska handknattleiksins. Þetta var átjándi sigur EH Aalborg í röð og áfram er liðið í efsta sæti deildarinnar með 36 stig að loknum 19 leikjum. Bjerringbro er tveimur stigum á eftir. Bjerringbro lagði Gudme á Fjóni í gær, 38:29.
- Berta Rut Harðardóttir og samherjar í Holstebro eru í þriðja sæti næst efstu deildar. Holstebro mætir Ringsted í dag.
- Steinunn Hansdóttir skoraði eitt mark þegar lið hennar Skanderborg Håndbold vann Silkeborg-Voel, 30:22, í dönsku úrvalsdeildinni í handknattleik í gær. Skanderborg Håndbold fór upp um eitt sæti með sigrinum. Liðið er í 12. sæti af 14 liðum með 9 stig þegar fjórar umferðir eru óleiknar.
- Storhamar vann Aker með eins marks mun, 29:28, á útivelli í norsku úrvalsdeildinni í gær. Axel Stefánsson er annar þjálfara Storhamars. Liðið er eftir sem áður í öðru sæti deildarinnar.
- Færeyska landsliðið í handknattleik karla tapaði fyrir rúmenska landsliðinu, 25:17, í síðari viðureign liðanna í 4. riðli undankeppninni Evrópumótsins í Búkarest. Rúmenska liðinu tókst þar með að hefna fyrir tapið í fyrri viðureigninni sem fram fór í Þórshöfn á miðvikudagskvöld.
- Í hinni viðureign riðilsins sem fram fór í gær vann Austurríki landslið Úkraínu, 31:28, eftir að hafa verið undir 14:11 að loknum fyrri hálfleik. Austurríki er með átta stig eftir fjóra leiki í riðlinum. Rúmenía hefur fjögur stig en Úkraína og Færeyjar með tvö stig hvor.
- Frakkar unnu Pólverja í áttunda riðli undankeppni EM á heimavelli í gærkvöld, 30:27. Franska landsliðið er með átta stig eftir fjóra leiki. Pólverjar eru í öðru sæti með fjögur stig. Ítalir geta jafnað Pólverja að stigum vinni þeir Letta í Ríga í dag.
- Daninn Nicolaj Andersson hefur verið ráðinn þjálfari Empor Rostock sem leikur í þýsku 2. deildinni. Meðal liðsmanna er Sveinn Andri Sveinsson. Liðinu hefur vegnað illa á tímabilinu með þeim afleiðingum að það situr í næst neðsta sæti. Andersson, sem er bróðir danska landsliðsmannsins, Lasse Andersson, hefur þegar tekið til starfa í þýska hafnarbænum.
- Auglýsing -
